政情：鬍鬚曾訪台全程粵語 玩殘記者
財政司司長曾俊華以港台經濟文化合作協進會主席身份造訪台灣，不過，曾俊華昨日抵台後喺台北晶華酒店嘅第一場公開講話全程用廣東話致詞，現場台灣記者完全聽唔明。
曾俊華話，今次去台灣主要係為香港經濟貿易文化辦事處揭牌剪綵，仲會會見台港經濟文化合作策進會董事長林振國，同時了解台灣嘅文創產業。曾俊華上次去台灣，已經係全程粵語對白，被台灣記者質疑無誠意，佢今次再去，仍然係自我感覺良好地廣東話通行無阻，記者都唔知佢講乜，真係失禮人。
袁國強表現幽默一面
喺香港，相信會出任律政司司長嘅資深大律師袁國強尋日以交通諮詢委員會主席身份見記者，表現咗佢幽默嘅一面。當記者問佢對雙非及釋法問題有乜睇法，佢就話「今日交諮會無傾過雙非同釋法問題」，希望傳媒能夠明白佢未能交代嘅困難，有傳媒問困難係咪要等中央批准，袁國強又盡顯風趣咁話：「今日交諮會傾嘅事，據我了解，中央無考慮到。」