政情：盲從激進派拉布 白鴿黨迷失立會
立法會議員出缺機制草案拉布戰已經打咗兩日，所花嘅公帑以百萬元計，消耗嘅仲有無數議員、官員、立會職員同記者嘅寶貴光陰，但至今仍冇任何終戰嘅迹象。喺今次拉布「運動」裏面，人民力量、社民連同公民黨等帶頭拉布嘅泛民黨派成功鞏固咗佢哋嘅激進形象同票源，建制派暴露出佢哋成日唔開會同遲到早退嘅陋習，立法會主席曾鈺成則被指裁決不公，但講到最傷嘅，就公認係民主黨（白鴿黨）等溫和民主派，估計佢哋今次盲從激進派大玩拉布流會，九月立法會選舉實現眼報！
曲線撐「公投」 不合邏輯
立法會內務委員會尋日討論成立小組委員會專責審議新政府架構重組，期間白鴿黨忽然發難，質疑政府要立法會先通過架構重組嘅財務方案，然後再通過相關嘅立法建議，係先撥款、後立法，做法不合邏輯。但內會主席劉健儀其後澄清，政府要財委會通過嘅，係增設副司長同新局長嘅開設職位建議，之後先可以透過立法，將原有司局長嘅法定權力轉移畀啲新增問責官員，絕對合乎邏輯同過往做法，搞錯晒嘅其實係白鴿黨。
查實白鴿黨點只喺架構重組問題上迷失？喺今次拉布流會戰中，該黨更加係失晒方向同分寸。兩年前社民連同公民黨透過集體辭職引發「五區公投」，浪費上億元公帑，當年白鴿黨面對龐大政治壓力同攻擊，都企硬拒絕參與「公投」，最後成功爭取中央讓步修訂政改方案，一度贏得唔少中間溫和選民掌聲。依家立會審議緊嘅出缺草案，正正係針對「公投」而設，白鴿黨卻反過來力撐激進泛民拉布，完全不合邏輯。
更重要嘅係，去年底舉行嘅區議會選舉結果已充分顯示，香港大多數選民係強烈反對人民力量同社民連嘅掟嘢爆粗同示威暴力行為，對公民黨嘅專業激進立場亦不表認同。喺區選中表現平平嘅白鴿黨，選後亦曾公開表明要同有關激進泛民劃清界線，以免喺立會選舉中再受牽連。言猶在耳，估唔到白鴿黨咁快就忘記得一乾二淨。拉布戰進行期間議員反正無所事事，佢哋係咪應該諗清楚未來嘅方向呢？