政情：梁粉傾施政狂轟煲呔曾
煲呔曾禍港七年，市民期盼候任特首梁振英（CY）上任後撥亂反正，尋日一班挺梁嘅「梁粉」雲集探討對CY未來施政嘅期望，但點知講講吓最後變成批評煲呔曾大會。其中恒隆主席陳啟宗（Ronnie）更點名話對煲呔曾任內嘅土地房屋政策感到莫名其妙，更直斥煲呔曾「錯」同「蠢」，完全當正煲呔曾嘅夕陽政府名存實亡，令人大快人心。
香港發展論壇尋日舉行「新特首‧新政‧新風」研討會，好多「梁粉」同疑似「梁朝」官員雲集，包括港區人大代表陳智思、教育學院院長張炳良、中大社會工作學系教授王卓祺、前梁營競選辦核心成員鄧淑德等都有到場。本來今次研討會主力討論「梁朝」施政，但煲呔曾過去七年施政拙劣危害甚深，多名與會者都義憤填膺開腔明批暗批煲呔曾及領導嘅夕陽政府。
土地政策莫名其妙
首先發炮嘅係CY嘅忠實支持者Ronnie，佢對煲呔曾任內土地房屋政策感到莫名其妙，其中○六年至一○年期間無賣地，Ronnie認為只有兩個原因，一係「錯」同「蠢」，二係「有其他原因」。之後Ronnie仲點出問題嘅核心，就係點解今日社會有咁多矛盾，呢個係同樓價上升有好大關係。
Ronnie其後疑似意有所指，話有啲人好易「買起」，知道你私生活就可以「買起」，相反CY就「買唔起」，所以大商家唔鍾意CY喎。佢又估計CY上任後，地產界會平穩發展，地產商會有錢賺，但未必會有「大茶飯」食，因為都賺咗幾十年喎。呢段講話，唔知係咪令人好有共鳴，台下嘉賓反應好熱烈。
陳智思其後接力狠批夕陽政府，批評財爺鬍鬚曾同部分局長，佢哋話有聽市民意見，其實係傳遞錯誤訊息，因為如果個個意見都聽，即係變相乜都唔做喎。話時話，一班梁粉對剩番兩個多月任期嘅煲呔曾同夕陽政府炮聲隆隆，毫不留手，反映煲呔曾以至成個夕陽政府已盡失民心。