中環出更：李遠康嫁女 豬仔包奉客
龍年喜事停不了，今次輪到「茶餐廳大王」翠華餐廳老闆李遠康。剛剛過去嘅星期日，李家大小姐李倩盈與五金廠太子爺鮑啟原（Ken）結束七年愛情長跑，拉埋天窗。一對新人喺尖沙咀洲際酒店設宴招呼親友，城中名人齊去沾染喜氣，包括協成行董事總經理方文雄夫婦、喜運佳常董梁青華夫婦、鏞記董事總經理甘健成、餐飲聯業協會會長黃家和等一眾飲食業大老闆恭賀。
莫樹錦「饑饉」完大啖食
一對新人將婚宴搞得好溫馨，中午先喺灣仔翠華餐廳包場宴客，影特色婚紗相，晚宴酒會時段就送上翠華自家出品嘅奶油豬仔包，夠晒創意。人稱「靚仔醫生」嘅莫樹錦都喺晚宴現身，一入場就吼住香噴噴嘅豬仔包，事關佢啱啱結束「饑饉三十」活動，餓足三十個鐘後嘅第一啖食物，就係即烤即製嘅豬仔包，難怪佢勁咬一啖，表情相當享受。
當晚飲食界翹楚雲集，卓妮發現黃家和同立法會飲食界議員張宇人同場出現，兩人由特首選舉到嚟緊九月舉行嘅立法會選舉都鬥得難分難解，當晚就趁機「休戰」飲番杯。是夜首次榮升外父外母嘅李遠康及太太Fanny忙到滿場飛，李家太子爺李祉鍵就自爆話，年底將會同女友Vivian拉埋天窗，確係龍年雙喜臨門，李遠康聽到即開心到合不攏嘴。
卓妮