今屆特首選舉中，好多提名咗唐英年嘅選委都臨時轉軚，改為支持梁振英，雖然投票保密，但選委尋日喺投票站嘅行為就被人睇得一清二楚。好似提名咗唐英年嘅新世界主席鄭家純，就喺梁振英發表勝利宣言時一齊站台，挺梁姿態盡顯。問純官會否擔心被人話佢係牆頭草？純官就話唔會介意人哋點睇佢，因為佢嘅出發點係為香港未來喎，仲話邊個當選特首都會企出嚟支持，純官確係犀利。
