政情：貪鳩死在禮賓府 煲呔曾滾蛋好兆頭
夕陽政府日落西山，威信、聲望同管治能力都蕩然無存，煲呔曾早前仲被本報獨家揭發貪盡海陸空醜行，令到本已苟延殘喘嘅管治步向死亡。煲呔曾醜聞纏身，就連佢居住嘅禮賓府都布滿貪腐污濁之氣，尋日就有隻灰色斑鳩飛入禮賓府後墮地死亡。原本死雀唔多好意頭，但有玄學家話，「鳩」乃慵懶和貪心之鳥，喺禮賓府死亡反而係好兆頭，寓意趕走煲呔曾呢啲貪官。
鵲巢鳩佔 似足貪曾
尋日朝早八時許，駐守中環上亞厘畢道禮賓府嘅一名警員，喺員工宿舍附近發現一隻長約十吋嘅灰色斑鳩屍體，警員擔心死雀染有禽流感病毒，安全起見即時通知漁護署派員檢走死雀。原本死雀不時會發現，但死嘅位置喺禮賓府，而且仲係「斑鳩」，咁就大事不妙喇，可能會係一種預兆，係好係壞，我哋就請教咗著名堪輿學家李丞責師傅。
李師傅話，「鳩」係慵懶和貪心之鳥，相信大家對成語「鵲巢鳩佔」耳熟能詳，成語故事內容就唔多講喇，總之鳩就係一種坐享其成、好食懶做、掠奪別人勞動成果嘅貪心鳥，霸咗人哋個雀巢，據為己有。呢種特性，同煲呔曾真係似到十足十，同佢貪盡海陸空嘅行為，不謀而合。不過，如果斑鳩死喺禮賓府內，又可以有另一個解釋。
李師傅話，大自然同動物，對於危機、災難都好敏感，從堪輿角度去睇，斑鳩死喺屋內，代表大事不妙，係對間屋嘅主人唔好嘅，意旨煲呔曾有危機。不過，正因為斑鳩貪心，趕走喜鵲仲霸埋人哋個巢，如今斑鳩死咗，意味喜鵲可以回巢，反而係一件喜事。
李師傅講到咁白，真係呼之欲出，即係話呢個係煲呔曾執包袱嘅先兆，一股貪官污濁之氣消散後，靜待新主人入主禮賓府。
話時話，禮賓府發現死雀，漁護署應盡快為死雀進行禽流感病毒測試，而且要盡快公布結果，事關萬一驗出有病毒，禮賓府嘅工作人員都可以提高警覺，避免中招，如果唔係，啲病毒傳傳吓搞到多隻死鴨就唔好啦！