政情：《獵首行動》緝拿貪曾
煲呔曾貪盡海陸空、由省港澳歎到泰國布吉，呢啲咁嘅利益輸送同貪腐行為，幸得東方報業集團不畏強權去揭露，先至可以將真相展現公眾眼前。自從煲呔曾嘅醜行兼惡行被揭發後，網上即時湧現大量改歌及改圖創作宣洩不滿，近日仲有人改埋影片，惡搞咗一條名為《ICAC獵首行動》嘅短片，所為嘅「獵首」，咪就係捉拿涉嫌利益衝突嘅特首咁解囉！
「禮賓府」片段嘲諷「廚房」宣言
呢段正片嘅製作非常認真，剪輯咗唔少新聞報道同片段外，仲加插之前一套有關廉政公署嘅電視劇片段入去，令到成段短片具說服力同完整性，可謂鐵證如山。短片一開首，就播出煲呔曾之前喺一個訪問節目中話，如果退休後可以買到間同禮賓府廚房一樣咁大嘅屋，畀佢退休後居住就已經心滿意足。
不過，片段之後隨即轉到煲呔曾接受富豪提供海陸空款待嘅畫面，當中包括乘搭富豪私人飛機及豪華遊艇，到澳門出席賭場春茗，與三山五嶽人士為伍，當然仲有早前爆出以超筍價租住深圳「禮賓府」啦，就係貪曾口中所謂「廚房」咁大嘅退休居所，認真諷刺。
段片講完煲呔曾嘅貪心惡行後，就講述廉署立案調查煲呔曾涉嫌貪污嘅片段，啲片來自一套講述廉署行動嘅電視劇，製作人剪片功力唔錯，劇情絲絲入扣，入木三分。短片最後係大批廉署調查員去到港澳碼頭捉拿煲呔曾，就連呢段都食埋煲呔曾上富豪遊艇住宿兼飲飲食食條水，與其話巧合，倒不如連上天都想收拾煲呔曾呢個貪官仲好。
最後煲呔曾落得被人落「孖葉」拘捕嘅下場，配埋佢獐頭鼠目、臉容扭曲嘅照片，簡直就係完美配搭。雖然呢個結局至今仲未成真，但相信段片講出製作人同好多市民嘅心聲。講真吖，網民咁好心機剪段片出嚟，講到底都係因為勁多人不滿煲呔曾涉嫌貪污瀆職，搞到天怒人怨，究竟佢仲要厚顏無恥到幾時先至肯落台呢？