今次拗數關鍵係辯論最後一節嘅「互相開火」環節，本來傾好可以由一位候選人自由向其他兩名對手開火，限時兩分鐘，如此類推。但由於籌委會怕太混亂，驚三人一齊「疊聲」，令觀眾分唔到邊個打邊個，所以改為候選人只可向特定人選發問，即係梁振英（CY）揀咗質問唐英年，何俊仁（鐵頭仁）就唔可以插嘴。
據聞唐營同何營都想「疊聲」大混戰，唐營希望藉此分散CY嘅攻擊力，而何營亦希望可以抽到水，費事做「隱形人」。不過，梁營就想主攻唐唐一人，放棄質問陪跑嘅鐵頭仁，於是最後傾唔埋欄，不歡而散。
籌委會話下周一最後拍板，但據聞三個陣營都企到好硬，睇怕今次辯論都係流產居多，除非有人肯妥協啦。