煲呔曾被本報踢爆接受富商提供海陸空豪華款待，包括乘搭富商遊艇往返澳門遊玩，除咗被市民上街聲討外，更被廉政公署調查。
一直獲煲呔曾夕陽政府「助選」嘅特首候選人唐英年，可能驚煲呔曾嘅惡行會拖低佢所餘無幾嘅民望，尋日就喺環保論壇上自稱好多年都冇坐過遊艇出海，寸爆煲呔曾之餘，仲以圖同佢劃清界線。
尋日三位特首候選人破天荒同場辯論，有環保人士問佢哋有無方法可以拯救中華白海豚。當唐唐自稱好多年未坐過遊艇出海，所以無親眼睇過中華白海豚後，對手梁振英（CY）就回應話：「我唔鼓勵市民坐遊艇出海睇白海豚嘅！」真係寸到唐唐應一應。至於候選人何俊仁就話自己多數乘搭公共交通工具，好少會坐遊艇，擺明寸爆貪坐遊艇嘅煲呔曾。
而無回鄉卡嘅鐵頭仁多年來都未返過內地，佢自嘲話如果自己真係做到特首，第一件事係要立刻攞番張回鄉卡，等佢可以返內地同廣東省嘅官員討論環保政策喎。