【本報綜合報道】ＮＢＡ全明星賽後備名單昨日出爐，一眾常客加納特、鄧肯及雷阿倫等統統名落孫山，5位新丁排住上位，其中馬克加素更踢走哥哥加素，首披明星賽戰衣，印證NBA正逐步改朝換代。連同早已落實成為正選嘅拜林在內，今屆明星賽多達6位球員首次入選。
3位老牌球星包括鄧肯、雷阿倫同已經連續14次出戰明星賽嘅加納特齊齊落選後備名單，就連湖人大前鋒加素亦冇份，取而代之嘅係佢嘅細佬馬克加素。另外艾迪列治、伊古達拿、希拔、鄧格都係首度入選，令今次明星賽後備名單共出現5張新面孔。
至於去季率領小牛勇奪總冠軍嘅魯域斯基，雖然新季各項數據全面跌Watt，但都能夠掹車邊入圍做後備，佢得悉後表示：「多謝咁多位教練畀面，能夠代表小牛出席呢項年度盛事真係無上光榮，到時我一定會交足貨！」全明星周末本月24日於奧蘭多展開，各項比賽名單將陸續出爐，有份入選西岸後備大軍嘅木狼前鋒路夫，更答允會玩埋3分賽。
另方面，本周紅人林書豪亦因為「爆得太遲」而未能入選，不過值得安慰嘅係佢前球會火箭總經理莫雷，昨日公開為裁走林書豪而呻笨，並指係因為受人誤導所以鑄成大錯，而佢更認為林書豪效應絕非係偶然，因為後者已證明佢係真材實料。
*希拔（溜馬中鋒）
保殊（熱火前鋒）
*鄧格（公牛前鋒）
*伊古達拿（76人前鋒）
皮雅斯（塞爾特人前鋒）
祖莊遜（鷹隊後衞）
迪倫威廉士（籃網後衞）
*馬克加素（灰熊中鋒）
*艾迪列治（拓荒者前鋒）
路夫（木狼前鋒）
魯域斯基（小牛前鋒）
柏加（馬刺後衞）
韋斯布克（雷霆後衞）
拿殊（太陽後衞）
*為首度入選