笑看天下：明天只是背景

很奇怪，個個從政者出來參選，無不變成慈眉菩薩，個個政綱都要打救世人，參選宣言都係可以掌握「明天」；奇怪的是，有實權時又唔見佢哋優化管治，締造和諧，到要更上層樓，忽然又變身超人，幻化成蜘蛛俠，一夜之間「告別冷漠、締造共融」。朋友，你信嗎？反正老朽只信「天上浮雲如白衣，斯須變幻為蒼狗」。

很奇怪，參選人造勢時，窮人都好似忽然雙腳裝上摩打，會極速脫貧，而中產更加長出翅膀，都成了天使，衣食無憂，細屋搬大屋，賺得多，說不定更不要交稅，「明天在你我」，一天都光晒！信佢？明天肯定從雲端摔下來，跌到你四腳朝天，屁股開花！

老朽捱過世界，不尚浮誇。活在當下，有工返，有稿寫，唔數落花、尋芳草，唔做詩人，做回自己，數銅臭，尋美食；明天的繁華夢，對大多數中下階層，只是一個背景，世界瞬息萬變，背景時時轉換，明天在你我，除夕煙花而已，信佢，你今日冇，將來都係一樣潦倒！