【本報訊】地溝油經加工後，外表與食用油無分別，就算是食油買手亦難分真假，北上的港人更是防不勝防，飲食業人士建議港人可從餐廳的價錢，信譽及人流「入手」，如果食物價格太過便宜，就好可能以地溝油烹調。
港九罐頭洋酒伙食行商會副理事長李廣林指出，地溝油顏色渾濁，且發出陣陣油饐味，「食嘅話會令人涸喉，但經加工後就好難分得出，再加埋溝咗其他成分，就真係好難分。」
「要分辨有冇用地溝油，好簡單，食貴啲囉！如果間餐廳平到二十蚊一個餸，你都估到唔會有好嘢啦！」食神梁文韜認為，在內地應該光顧有信譽的大型食肆，可減低誤食地溝油的機會。另外，少年食神林澄光則表示：「返大陸食嘢，有時連裝修都信唔過，應該睇吓人流，如果多人幫襯，即係有信譽同信得過！」