中環出更：黃子欣娶新抱 政商畀面撐場
偉易達主席黃子欣（Allan）娶新抱。尋日下午約兩點，黃家公子黃以禮（William）同新娘子Ophelia，喺中環花園道聖約翰座堂行禮，到場見證嘅政商界名人逾二百人，現場洋溢着歡樂幸福嘅氣氛。
沙煲兄弟田二少到賀
見證一對新人行紅地氈嘅名人多不勝數，包括財經事務及庫務局局長陳家強、金管局總裁陳德霖、前財爺梁錦松、合和實業主席胡應湘夫人胡郭秀萍及囝囝胡文新、女童軍總會副會長梁王培芬、立法會議員林健鋒（Jeffrey）等。Jeffrey話，佢同Allan都係做電子、玩具呢行，大家相識幾十年，梗要嚟分享吓喜悅啦。
Allan榮升新老爺，又點少得作為沙煲兄弟嘅新民黨副主席田北辰送上祝福吖！記得去年Allan同田二少、富士攝影器材主席孫大倫及德昌電機主席汪穗中等五位壽星公，組成「五虎將」喺君悅酒店共度六十歲生日，大家情誼匪淺，二少梗要陪老友見證呢個開心時刻。
Allan創辦偉易達逾三十年，成就有目共睹，去年更加躋身《福布斯》富豪行列。新郎哥William遺傳咗爸爸嘅創業精神，不靠父蔭自創毅力科技公司，認真抵讚。
卓妮