中環出更：方平白富鴻嘗社企法國菜
近年非牟利嘅社會企業百花齊放，原來社企可以係高級法國餐廳。日前卓妮見到中華廠商聯合會常務會董方平及會董白富鴻喺上環文咸東街柏廷坊三樓嘅La Parole歎午餐，人稱「白老大」嘅白富鴻即將卸任菁英會主席，躊躇滿志打算投身地區工作，方平就啱啱當選葵青區議會主席，所以當日兩人一邊食飯做善事，一邊交流心得。
上個月啱啱接任半山社區事務促進會主席嘅白老大，七月一日之後將「升呢」做菁英會榮譽主席，到時會多咗啲時間，所以佢興致勃勃諗住投身地區工作。同佢喺廠商會結緣嘅方平，投身地區工作多年，上個月因為前任葵青區議會主席鄧國綱喺鄉委會選舉中落選，再唔係當然議員，故令該區主席一職出現空缺，經改選後由方平當選。方平話，當選後畀面派對突然多到飛起，個幾月嚟只食過一次住家飯，所以佢寄語白老大如果有心從政，一定要做好心理準備。
La Parole嘅母公司Confiserie Benji原來亦係比利時最大朱古力品牌Leonidas嘅香港代理，老闆黃家寧夫婦將愛心朱古力及法菜嘅收入扣除成本後，全數捐畀提供一對一言語治療服務嘅庭恩兒童中心。呢個中心都係黃氏夫婦創立，打扮樸實嘅黃太當日都喺餐廳打點，講起做社企嘅理念同埋對餐廳質素嘅堅持，令人感動。
師從米芝蓮星級主廚
咁高檔嘅社企，城中名人更加要密密幫襯。當日白老大叫咗重點推介嘅甘筍湯，同埋主菜羊腿配香草汁拌南瓜蓉，方平就叫咗香甜比目魚拌湯燉鮮菜，同樣令人一試難忘。
La Parole嘅法籍總廚Eric Taluy只得廿七歲，曾經師從米芝蓮星級主廚多年，精於將傳統嘅精緻法菜，以時尚風格擺設提升享受層次，難怪餐廳碟碟菜式都嫓美藝術精品，處處充滿驚喜。
卓妮