中環出更：台灣幫設宴歡送孫鴻文

重量級人物齊集

當晚台灣幫重量級人物齊集，除咗楊家駿夫婦、光華新聞文化中心羅智成夫婦之外，遠東貿易中心主任陳光丕、台北貿易中心總經理劉錫威等官方駐港機構代表都喺度，認真畀面。當晚台灣幫商界領袖亦百忙中抽身到賀，包括日本救心代理嘅泰山企業老細林添茂、亞洲聯合財務董事總經理長原彰弘、身兼港澳台灣同鄉慈善基金會主席嘅好易通老細錢立祐，以及台灣同鄉會會長王茂林等，現場氣氛既溫馨又熱鬧。

同台灣關係密切嘅珠海學院校監江可伯都喺度，珠海學院近期發展唔錯，早排佢哋新聞及傳播學系出版嘅《珠海新聞》專訪全國人大常委會委員范徐麗泰，范太提到下屆特首需具備嘅條件，引起全城報紙爭相引述，珠海嘅辦學成績愈嚟愈有目共睹，加上新校舍過多兩年就落成入伙，難怪老當益壯嘅江可伯笑得咁開心。