政情：聶德權分身湊七百「仔女」

不過，大家唔使驚慌，因為呢七百幾個「仔女」同佢無血緣關係，只係因為種種原因，好似父母雙亡、失蹤、入獄、長期留院、欠缺照顧嘅能力等，而要社署按法例向法庭申請委任社署署長做佢哋嘅法定監護人。

聶德權眾多「仔女」之中，有個叫小月（化名），仲有幾日就夠一歲，去年畀人遺棄街頭，身上無任何身份證明文件或資料，其後就被頒令由社署署長作為佢嘅法定監護人，同時亦按既定安排跟現任社署署長聶德權姓「聶」。依家七百幾個小朋友之中，已有六個姓「聶」。

「聶爸爸」去探訪香港保護兒童會童樂居，同院內嘅「仔女」歡聚，送玩具之餘，仲同小月提早慶祝生日添，認真溫馨。「聶爸爸」仲好感謝院舍員工悉心照顧佢班「仔女」，等佢哋身心可以健康成長，佢仲鼓勵班「仔女」要積極樂觀，多啲參加活動，尋找個人興趣同發展潛能。