政情：葉根銓涉違規攞着數
財政司司長政治助理葉根銓呢排是非纏身，繼早前被指代財政司司長鬍鬚曾向前政府資訊科技總監葛輝施壓，又爆出一單發生喺舊年嘅疑似違規攞着數醜聞，並且係因佢喺《蘋果日報》任職執行總編輯嘅太太而起。
旅遊發展局去年五月邀請本地傳媒高層到廣東開平參觀，玩兩日一夜，葉根銓嘅老婆都有獲邀，但最奇係當時已經入咗政府做嘢嘅葉根銓，居然都有隨行，令人質疑有人借官職或配偶關係攞着數。
我哋搵過旅發局求證，發言人話，該活動其實係由開平市旅遊局主辦，由於喺周六日舉行，有參加者提議攜眷出席，開平方面又答應喎，所以葉根銓咪可以一齊去囉。發言人強調，葉根銓有自己畀番旅發局方面嘅開支，該局絕無濫用公帑，但開平方面就冇收番錢。
當事人葉根銓回覆本報查詢時亦話，當日係以私人身份跟太太出席，「平日好少陪老婆，有機會咪一齊去囉」，又指自己未落船已畀番旅發局份錢，加上該兩日係假期，認為絕對冇問題，亦唔覺得要向政府申報。
問責官員行為指引訂明，問責官員以官職身份、甚至代替配偶以私人身份接受贊助訪問，都必須向特首申報，但係就冇對以攜眷方式陪同配偶出訪作出規定，因此葉根銓算唔算違規，仲未肯定，不過起碼都踩界囉。再者就算冇違規，自己身為政府高官，老婆卻任職傳媒高層，本身就已經有角色衝突之嫌喇！都唔明煲呔曾同鬍鬚曾點解會揀佢。