政情：葉劉選戰偏向虎山行

新開辦事處 黎棟國撐場

新民黨嘅地區工作向來主要集中喺港島區同新界西，尋日就首次跳入九龍東開設油塘地區辦事處，由做咗十六年警務督察協會主席嘅廖潔明擔大旗，明眼人一睇就知係為咗區選鋪路。同廖Sir喺九龍東拍住上嘅仲有前消防處救護員會主席屈奇安，就會負責下月喺新蒲崗開設辦事處，主攻服務采頤花園嘅居民。至於上月才入黨嘅前消防處職工總會主席崔志強，亦會喺八月落戶天水圍辦事處參與地區工作。

葉太為咗幫廖Sir壯聲勢，尋日call齊老友到油塘辦事處撐場，除咗請到觀塘區議會主席陳振彬外，仲請埋前下屬、保安局副局長黎棟國到場振聲威。 未知係咪眼見葉太嘅「政治紀律部隊」人強馬壯，黎棟國即時向前上司葉太大讚特讚，一方面激讚辦事處開幕時間係好時辰，風水非常之好等等，又呼籲街坊盡快登記做選民，差在未叫埋大家支持新民黨啫。

廖sir話，佢喺上周五先喺服務廿九年嘅警隊中退休，又計好時間喺九月二日佢五十五歲生日時，先正式入黨，目前仍然係以義工嘅身份服務市民喎。猶記得○七年區議會選舉時，葉太以匯賢智庫（新民黨前身）旗號，派出兩名前紀律部隊人士企圖搶灘，但最後無功而歸，今次佢再次押注喺前紀律部隊嫡系，最終佢哋係咪不負所託，等多幾個月就自有分曉。