政情：公民講場：放債行業欠監管 劉怡翔齋噏當做咗嘢

依家借錢係咪好易？好多廣告甚至話唔使任何文件就可以借到，消委會尋日發表研究報告，直指借貸市場出現九大問題，仲話規管市場嘅《放債人條例》四十年來零修改，同市場嚴重脫節添！老實講，外界曾炮轟政府，話借貸廣告存在誤導成分，財經事務及庫務局先肯話加幾句宣傳口號，例如「借還借，還得到先好借」等去警惕市民，但對於規定行業機構就放軟手腳，局長劉怡翔翹埋雙手唔做嘢，係靠害市民。