上樑不正下樑歪，煲呔曾做人做事都親疏有別，佢口中所講「好打得」嘅發展局局長林鄭月娥自然有樣學樣，事關發展局尋日成立嘅九龍城市區更新地區諮詢平台，十四位非官方成員之中，一位泛民主派嘅人都冇，睇怕將來諮詢完有乜政策要出台時，泛民唔反對兼搞對抗都幾難，結果又係自找麻煩。
九龍城市區更新地區諮詢平台主席係前香港工程師學會會長黃澤恩，其他十四位非官方代表中，除咗專業人士外，有四名係九龍城區議會議員，全部來自建制派，民建聯嘅包括蕭婉嫦及尹才榜，自由黨就有何顯明，剩低嗰位係九龍社團聯會理事長王惠貞。
其實諮詢平台工作同當區居民息息相關，民協同民主黨好歹都有幾名九龍城區議員，民選議員更加有其代表性，絕不能將佢哋拒諸門外。再者陰謀啲諗，泛民有份參與，萬一出台嘅政策惹來批評，都多啲人一齊負責，除非當局預期所有政策有好冇壞，明益自己友啦！