政情：校園問題考起唐偉章
八十後、九十後出名夠激，經常喺論壇或交流會上語出驚人，問到台上與會者口啞啞。理工大學校長唐偉章尋日喺校園內與一眾學生交流時，同樣被問到啞口無言，但並非學生嘅問題尖銳，而係涉及一啲好實際嘅校園問題，可以講係雞毛蒜皮，所以搞到「理大秋官」唐偉章都呆一呆唔知點答。
相信大家會好想知道啲學生問咗乜嘢辛辣問題，第一條係問校長點解電腦室唔夠櫈，搞到有電腦但無櫈坐；第二條係如果有課室空置，可唔可以借用做Group project；第三條仲妙，問校長點解Ｍ座樓嘅飲水機擺得咁遠，可唔可以近啲喎。結果搞到唐校長要將問題交畀台下嘅校管高層職員代答。
通常校長同學生舉行交流會，都會討論一啲學校課程發展及較前瞻性嘅問題，但觀乎尋日學生嘅提問，睇嚟唐校長真係要好好了解一下發生乜嘢事，點解咁「實況」嘅問題，學生要揀呢個難得可以直接對話嘅機會嚟反映呢？