政情：肥亨撐蔡瑩璧掌商局

肥亨尋日接受電台節目錄影訪問，事後我哋問佢對盛傳Yvonne可能接任局長有乜睇法，佢首先自爆喺早個禮拜三，先同Yvonne及一班商界朋友食飯敍舊，可見兩人關係幾好。當時已傳出Rita患上腸癌，但未知嚴重到要辭職，因此眾人都冇傾過Yvonne會唔會重返政府嘅問題。肥亨形容Yvonne面色同精神一樣Fit到漏油，強烈暗示佢重掌要職都冇難度。

肥亨之後大讚Yvonne有魄力，當年做佢下屬時，日日晨早返工、夜一夜先放工，好似唔使瞓覺咁，喺公務員隊伍內早已出晒名。佢又指Yvonne同商界嘅關係同網絡都好好，絕對有能力做呢個位，但最後仍要睇Yvonne自己嘅決定。

談及亦短暫做過佢下屬嘅阿Greg，肥亨就話向來冇明文規定局長辭職，副局長就一定可以接上，又話相信特首會作出「明智嘅決定」委任適當人選，依家都冇人話一定唔畀阿Greg做，大家毋須過早下定論喎！同佢對Yvonne嘅評價真係差天共地。

蔡突現身時裝展

都唔知兩人係咪預先夾定，Yvonne喺下午突然現身一個時裝展，係Rita辭職後佢首次出席公開活動。我哋立即追問有冇人搵過佢做局長，Yvonne就用佢嘅招牌笑容回答：「哈哈哈，唔好講呢啲嘢喇。」不過呢個行貨答案，連出席同一場合嘅婦協主席林貝聿嘉都唔滿意，變身記者再問多次Yvonne，佢最後再拋出一句：「我退咗休喇！」不過Yvonne似乎對有咁多人撐佢表現得好開心，難以猜透佢嘅真正心意。