中環出更：改衫啱身梁高美懿大讚
內柔外剛嘅女性，係男士嘅夢寐好逑，好似恒生副董事長兼行政總裁梁高美懿，返工衝鋒陷陣，放工就溫柔體貼，既係好女兒又係好媽媽，一身多個角色，面面俱圓，但估唔到貴為銀行女大班嘅梁太，原來連改衫都會親力親為，而且表現得樂此不疲添。
卓妮上周五下晝三點半鐘行過太子大廈，見到有個熟悉身影快步走過，原來係梁高美懿，正想上前打招呼之際，梁太就愈行愈快，由太子大廈一個箭步過咗遮打大廈，再穿過環球大廈，然後入咗一間實而不華嘅改衣店。
梁太入到去，店員已迅速遞上幾套行政套裝，梁太熟練地行到角落頭嘅簡單試身室，拉埋布簾試衫，無耐就陸續換咗三套分別為白色、淺粉紅及較花嘅套裝出來，梁太稍作整理，再畀店員睇吓，一臉滿意地大讚改得好靚、好合身，跟住立即到櫃面支付改衫費。
離開即call司機
全個試衫過程唔夠廿五分鐘，梁太就極速抽住一大袋衫離開，然後邊行邊致電司機接佢。不過，梁太行到門口仲未見座駕，即急Call司機接載，五分鐘後，座駕駛至，司機快速落車接過梁太手上嘅大袋衫，之後載梁太到滙豐總行開會，然後再返恒生總行出席活動。
卓妮