香港法治原來係掛羊頭賣狗肉，執法者可以隨心所欲，一而再、再而三放生淫賤積犯，簡直荒謬之極！
壹淫媒旗下網站以「如何自行檢查乳房」為名，播放一套女子裸露胸部短片，四分鐘片段全程冇打格仔，乳房大特寫加上搓揉按壓，乜都有齊，結果被淫審處評為第二類不雅物品。但奇怪嘅係，影視處居然又玩放生，喺相關網站修改警告字眼之後，表明唔再採取任何檢控行動喎。
喂，根據本港法例，發放不雅物品係刑事罪行，一經定罪，初犯者最高罰款四十萬元及監禁一年，再犯者最高罰款八十萬元及監禁一年。影視處一句「唔再採取任何檢控行動」，就放過壹淫媒，豈不是視法律如無物？豈不是助紂為虐荼毒青少年？
壹淫媒將短片嘅警告字眼變來變去，淫審處未評級前係一個版本，評級後又係另一個版本，甚至被正式評為二級不雅物品之後，有關字眼亦唔符合法例要求，直到被本報踢爆先至再次修改。三歲細路仔都睇得出壹淫媒喺度玩嘢，但影視處居然有法唔執，乜都唔做，簡直豈有此理！
影視處話喎，由於相關網站負責人已為短片加上適當警告字句，所以該處不擬採取進一步行動。咁都得？正如資深大律師陸偉雄話齋，「冇理由個人打咗劫，之後認錯，畀番啲錢人就可以當冇事」。另一位法律界人士黃國桐亦認為，影視處有罔顧法律精神之嫌，呢種放生網站宣淫嘅舉動，會助長歪風，「係好壞嘅榜樣」。
更離譜嘅係，影視處今次放生壹淫媒，並冇徵詢過律政司意見，即係自把自為啦。身兼淫審處審裁員嘅執業大律師龔靜儀就質疑得啱嘞：「點解影視處有法例唔跟，要跟啲冇法律效力嘅業務指引？」講真，散播不雅物品罪大惡極，影視處以權代法，隨意放生淫媒，同幫兇根本冇乜分別。
查實，港府放生壹淫媒唔係第一次，而係百擒百縱，見怪不怪咯。壹淫媒旗下刊物有一百一十六次違反《淫褻及不雅物品管制條例》案底，如果按照法例規定，有人就算唔坐穿牢底，亦早就被罰到破產喇。但事實又係點呢？事實就係壹淫媒百幾次犯案，百幾次被放生，罰款輕則數千，重亦不過數萬，簡直同淫賤黎大人抓痕冇乜分別。最惡劣嘅係，壹淫媒以各種理由拖延十九宗涉及發布不雅物品嘅審訊，令案件纏擾多年，最後只得十二宗被定罪。今次仲離譜，影視處連檢控都慳番，你話唔係包庇，細路仔都唔信喇。
講番掛羊頭賣狗肉，壹淫媒旗下爛果報○六年有篇標榜介紹「性愛運動治百病」嘅報道，充滿色情動作，被淫審處評為不雅，當局又係咁意罰少少錢就算。有婦女團體直斥當局執法太寬鬆，建議加重屢犯者嘅罰款，以收阻嚇作用。
鬼咩，香港嘅法治早已名存實亡，對壹淫媒點可能有阻嚇作用呀。台灣就唔同嘞，人哋揸正嚟做，依法辦事，伸張正義，絕對唔會放過淫媒。呢，台灣爛果報旗下「動新聞」宣淫揚暴，早排被台北市政府合共罰款一百萬元新台幣，雖然壹淫媒提出上訴，最後仍被台北高等行政法院裁定敗訴，罰得有理。
正所謂「禁姦止過，莫若重刑」。台灣有正氣，違法必究，執法必嚴，壹淫媒宣淫販賤，見一鑊罰一鑊。唔似得香港當局姑息養奸，法例形同虛設，壹淫媒橫行無忌，愈淫賤愈快樂。唉，香港餘孽當道，淫邪作惡，烏煙瘴氣，亂七八糟，都唔知幾時至可以見到青天！