本港公立醫院終於有單好新聞嘞！威爾斯親王醫院急症室明天早上八時搬去造價二十一億嘅擴建大樓「住院主樓暨創傷中心」，面積比舊急症室大兩倍幾！
仲有仲有，新大樓嘅總面積達七萬幾平方米，引入無底片放射檢查系統、負氣壓手術室、雙門抽氣隔離病房等新設備。院方話喎，新大樓有成十六間手術室，住院病床總數比舊大樓多四十張，其中深切治療部病床由二十二張增至三十二張，多咗四成半，簡直係大躍進呀！
不過呢，大家唔好咁快開心住。事關威院擴建後雖然面積大咗、設備新咗，但醫護人手不足嘅問題依然未解決。以早前搬咗嘅深切治療部為例，由於護士嚴重流失，擴建前已經只開二十張病床，擴建後嘅三十二張病床家下亦係只開二十張咁大把。換言之，因為人手不足，深切治療部有十幾張病床自廢武功，擴唔擴建都係無分別嘅。
深切治療部係咁，急症室嘅情形又點呢？嗱，坐穩啦老友。威院急症室原本有三十幾個醫生，今年初已經有五個離職，流失超過一成。因為咁，病人嘅輪候時間愈來愈長，早前有個男嬰發高燒到威院急症室求診，居然等足六句鐘。唉，急症室變成「慢症室」，隨時小病拖成大病。
大家不妨諗諗，舊急症室人手唔夠，已經七個蓋冚十個煲，家陣新急症室大足兩倍幾，大吉利是講句，萬一真係有三倍病人求醫，咪隨時上演七個蓋冚三十個煲嘅奇景？威院話喎，為咗應付醫院搬遷，醫護人員三個禮拜內唔准放大假，雖然搬急症室唔使暫停服務，但頭幾日難以應付大型事故，要到下周一先至回復原本收症數目。怕只怕，到時嘅情況都未必好好多。
講真吖，近年公立醫院人手持續流失，拖慢診症仲係其次，最得人驚係人手不足下，服務水平愈來愈低，醫療事故愈來愈多，好似診錯症、派錯藥、打錯針、開錯刀等等，千奇百怪，應有盡有，唔應有嘅都有，每年唔知造成幾多病人枉死。
公共醫療亂象叢生，事故層出不窮。好笑嘅係，以周一鑊為首嘅醫療高官無辦法改善公院服務，反而話要鼓勵私家醫院擴充營業，大力發展醫療產業喎。功夫茶好想問問周一鑊，港府鼓勵私家醫院擴張，人才由邊度嚟？咪又係向公立醫院搶人！到時公院人手流失唔惡化就奇啦。
講到底，醫院擴建雖然係好事，但硬件還須軟件配合。當局唔加緊培訓醫護人才，就算有再大嘅醫院、再新嘅設備都係嘥料！