政情：八達通私隱風波愈揭愈臭

八達通控股行政總裁陳碧鏵尋日和盤托出，承認過去四年半以來，合共將一百九十七萬個客戶資料轉售畀六間公司，從中獲利四千四百萬元。一直對八達通窮追猛打嘅立法會議員王國興，狠批八達通好唔老實，當初口口聲聲話無轉移客戶資料，依家先發現牟利方式真係意想不到，原來出賣客戶資料可以年年計，賣一次計一次錢，仲有花紅添，真係好多獎賞。佢話應該引用《立法會（權力及特權）條例》查清楚，還公眾一個公道。