政情：邱騰華「焗」住乾蒸自作自受

邱騰華揀咗大暑後至去，尋日天公都算作美，唔似前日咁要發酷熱天氣警告，最高氣溫大概係攝氏三十二點二度，仲不時有風。成個「圍焗」之旅共有五個站，玩轉港九，包括上環巴士站、銅鑼灣馬路旁、紅磡的士站、旺角小巴站同藍田有蓋公共運輸交匯處，行程相當豐富。

根據天文台提供資料，尋日最高氣溫雖然都有攝氏三十二度幾，但可能因為有風、濕度唔太高關係，全日唔使發酷熱天氣警告。雖然係咁，擺喺露天巴士場兩個幾鐘嘅巴士，上層車廂溫度高達攝氏四十六度，下層好少少，但都有攝氏四十度。即使按當局稱可停車撻匙三分鐘，溫度都係降幾度咁，呢個數字咁誇張，都幾難說服人哋停車熄匙。至於的士停車熄匙三十分鐘，車廂入邊嘅溫度都接近攝氏四十度。

全程「戲肉」發生喺紅磡的士站。話說該站一向大排長龍，分為「過海的」同「九龍的」，其中以「過海的」排得最耐。有在場的士大佬話，至少排成半粒鐘，先可以排到第六位，有時要等成個鐘。結果邱騰華喺紅館上咗業界一早為佢準備嘅的士，車佢去紅磡火車站附近嘅的士站，點知畀業界載咗去排「過海的」，隨時焗成半個鐘。

甘乃威（左）、梁耀忠（中）及劉健儀坐完一陣蒸籠旅遊巴後即時汗流浹背。	邱騰華（前右二）被過百名的士、小巴大佬圍攻。	邱騰華（右）到旺角了解馬路附近商販吸廢氣苦況。

「局長咁快落車、頂唔順呀！」

話說邱騰華坐咗近十分鐘後，一度落車打算視察車站環境，但部分司機大佬同立法會議員梁國雄即時阻截，大叫「局長咁快落車、頂唔順呀！」，又焗番邱騰華上車，仲以佢坐嘅的士打尖為由，要佢由龍尾排過，又要等多幾架車。結果邱騰華原訂逗留四十五分鐘，變成加碼多半個鐘先完場，搞到佢全身濕晒不特止，面色都唔多好，期間仲有示威者戴住防毒面具示威贈興。雖然有航運交通界立法會議員劉健儀等一班議員陪佢一齊焗桑拿，但佢哋係攞住溫度計同佢計算，都認真唔好受！

成個旅程歷時五個幾鐘，事後邱騰華死都唔表態親身坐同想像坐「蒸籠」搵食車有冇分別，只係強調每個人都會感受過。不過佢都留下再「讓步」伏線，話明白酷熱天氣下停車熄匙，搵食車司機一定首當其衝，睇吓可唔可以就一啲特殊交通情況同站頭豁免數量，再同立法會傾吓喎。