- on.cc主頁
- 3月22日 (六)
人生猶如樂章有高低起伏，順境固然要珍惜，但逆境更要處之泰然。曾被喻為「打工皇帝」嘅前中信泰富董事總經理范鴻齡（Henry），自從為公司炒燶外匯而辭職、除去「公職王」稱號後，生活洗盡鉛華，莫講話甚少出席社交場合，連衣食住行都返璞歸真。繼上月目擊佢同太太幫襯北角一間茶餐廳後，卓妮前日又撞到佢喺中環中匯大廈間馬莎百貨掃恤衫。
行政會議前日喺中環一間酒店舉行每月一度嘅「Thursday Lunch」（星期四午宴），行會成員與嘉賓眾多，做過行會成員嘅Henry都係座上客。午宴一完，卓妮見到Henry獨自行到皇后大道中嘅中匯大廈地下間馬莎百貨。Henry一個箭步行落地庫男裝部「BLUE HARBOUR」品牌系列，揀選Soft Touch短袖格仔恤衫，望咗一陣後，好快就拎咗幾件入試身室。
Henry話咁快就試完衫出嚟，隨即去收銀櫃枱付款，總共買咗五件恤衫，盛惠一千八百四十元。卓妮上前同Henry打個招呼，雖然佢顯得好愕然，但仍與卓妮分享買恤衫心得。Henry話，馬莎啲恤衫好抵着，質料咁好都係賣幾百元，算係經濟實惠，同有錢佬着嘅恤衫價錢相差一大截！其實Henry使乜咁謙吖，佢以前一年幾千萬年薪，仲唔係有錢佬？只係知慳識儉之嘛！
卓妮
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |
