Windbreakers風雨同路
呢個世界褸款何其多，但揀得風褸，就梗係貪佢又Sharp又夠Multifunctional，如果唔係不如揀件舒舒服服嘅棉質衞衣！今時今日，山系風格大熱，再加上人人都扮晒運動狂熱分子，所以唔少潮人嘅衣櫃裏面都有件風褸，用嚟襯衫又好，湊吓熱鬧又好，總之依家風褸搖身變成最Hot的Gear！其實風褸款式多變，顏色千變萬化，如果想堅持Sporty但又想高調，學識以下幾誡實冇死！
女生懷抱
春天和秋天都係適合着風褸的季節，同樣有少少風和涼意之餘，春天更不時有雨水霧水，着風褸嚟遮風擋雨至為Perfect！輕身可摺疊、方便收藏於袋中，是現時其中一個賣點，至於穩膽功能則必定有防水擋風、吸汗透氣等等，無論咩天氣都應付得到。
近年風褸多款多色，甚至興起花喱花綠嘅繽紛Pattern，心心、波點、幾何圖案等都應有盡有，難怪令到不少女生改投風褸的懷抱。當然未必款款風褸都能內外兼備，有些Sell款的，在細節設計上未必咁講究，但勝在可以來個Sporty Chic造型，趕上潮流步伐！
第1誡：反光半透惹注目
唔少運動迷要喺放工後先有時間去做運動，為咗顧及呢一點，不少品牌的風褸刻意加入圖案反光物料，在黑夜中有搶眼作用，提高安全性，非常有心思。為令款式更Charm，某些設計更起用半透明的防水物料，即使大白天都依然惹人注目，又有實際擋雨功能，唔錯！
第2誡：內袋防跌一流
活喺科技年代，手提電話無時無刻都要跟身，甚至做埋你最好嘅Trainer；當然，現時做運動要電話跟身都冇有怕，因為有些風褸在內裡都加設一個拉鏈內袋，即使跑步都唔怕跌嘢出嚟。除此之外，簡單放身份證和小量現金都絕對夠應付有餘，大家就可以無憂無慮跑個痛快。
第3誡：索帶美觀不亂揈
大風或落雨都要堅持練跑做運動的A餐女生，用帽笠住全個頭就當然少理，但慘在頸部位置仍然有機會受風雨入侵；所以呢個時候帽子附設索帶設計就至關重要，方便調校鬆緊。當中有些更內置索帶，可簡單兩邊一扯作索繩用，不用帶子長期外露，跑到幾快都唔會揈下揈下。
第4誡：粗身袖口有層次
着重功能性或款式的差別，就要由最細節的着眼位開始睇起。做運動事必汗水多，所以幼身袖口的設計可以減輕流汗後肌膚的黏立感，加上通風效果好就可以快啲乾爽番。至於要款的話，粗身袖口設計明顯較有層次，入面襯件長袖衫做Layering都仲得。
第5誡：透氣排汗內籠
排除要為身體健康而做運動的人，其餘好多都只不過係想減肥Keep Fit。着住件風褸做運動，除咗保溫外，仲可以焗出一身汗達到消脂效果，而內籠選用透氣排汗的物料，就可以Keep住入面乾爽，唔會有黏立立嘅不適感，個人仲冇咁易Over Heat添。
第6誡：兩側褸袋講深度
風褸正面兩側有褸袋的設計固然唔錯，用嚟放吓現金、小毛巾都得，只可惜開口設計，跑兩跑容乜易咩都跌晒出嚟？所以識得揀，一定係揀有「深度」的褸袋，若然能夠有條拉鏈做保安，咁就萬無一失。同埋嚟一個溫馨提示，正面褸袋絕對不能放有重量嘅物品，否則撞吓撞吓，有可能會整親自己！
第7誡：皺晒點會靚
有時簡單就是最好，太多細節反而會弄巧反拙。想做到領口索帶又想要有層次，好多品牌會做縐褶索帶，但當索帶索緊時，就會自然皺埋一堆，毫無美感，好似啱啱喺衣櫃搵番出嚟咁。
數字人生：Ray-Ban
4 為了確保鏡框外形光滑無瑕，所有鏡架都經過4天的打磨工序。
15 品牌出品的B-15 XLT鏡片是為美國空軍專門設計。
18 月前推出了第一副以18K黃金製作的鏡架。
100 品牌鏡片通過多國的品質檢定，有100%防紫外光的功能。
1937 品牌於1937年成立，亦在同年的5月7日設計出經典的Aviator款式。
1952 1952年，品牌設計出另一個經典款式「Wayfarer」。
撰文：黃佩琪
攝影：胡振文
查詢電話：（a）2388 1343、（b）2730 0157