34D陳瑞瑩 借碧咸 嫂尋夢
有「翻版碧咸嫂」之稱的中國、瑞典混血模特兒陳瑞瑩，去年底代表香港出戰「Asia's Next Top Model」勇奪第5名，憑着標致外表與34D魔鬼身材，迅速成為模界新貴。小時候已夢想要做model的她全靠鍥而不捨的精神努力追求夢想，自薦入行，終成功踏上天橋。她希望借自己的經歷告訴大家，堅持夢想總有成功的一天。
大家對陳瑞瑩（Helena）這個名字可能不太熟悉，但這位模界新星其實大有來頭，去年曾代表香港到新加坡參加美國人氣真人騷「America's Next Top Model」的亞洲版「Asia's Next Top Model」，單是初次選拔時就成功fight低近50,000名女生，成為來自13個亞太地區共14位進入超模比賽真人騷的參賽者之一，之後經過多輪競爭激烈的淘汰賽，勇奪第5名，過程可謂過五關斬六將，能夠在來自亞洲各地一眾模界新秀中突圍而出，Helena的優秀條件毋庸置疑。
Helena現為混血名模Ana R.以及Jessica C.師妹，身為中國與瑞典混血兒的她，五官輪廓極深，參選超模時更被指貌似碧咸嫂Victoria，有「翻版碧咸嫂」之稱。擁有34D噴血上圍的她，打破了超模多屬高瘦平的定律，是個身段曲線玲瓏浮凸的靚衣架，難得她不介意性感演出，為泳裝內衣騷注入新血。
自薦５年有回音
今年剛大學畢業即全身投入模特兒界的Helena，原來小時候已夢想要做model，她說：「我自細已經好想成為model，細個時爹哋媽咪幫我影相，我就不停係咁擺甫士，好享受影相嘅過程。到我16歲時，我就決定要展開我嘅model之路，唔可以得個諗字，一定要踏出第一步，要行動。我寫信去唔同嘅模特兒公司自薦，可惜冇agency要我，我不斷好努力咁嘗試，雖然收唔到任何回音都會失望，但就從來都冇氣餒，更加冇諗過放棄，一直keep住寄信自薦，終於喺5年後我收到一間agency嘅電話，叫我上去casting，嗰刻真係好開心。點解我咁多年都冇停止過寄信自薦？因為我覺得send封信只係需要花幾分鐘，係好簡單嘅事，我想追逐我嘅夢想，點解咁都唔去做？我希望有日會夢想實現，所以我會堅持落去。」俗語說世上無難事，只怕有心人，Helena這份鍥而不捨的精神亦為她打開了通往時裝天橋的大門，正式加入模特兒行列，去年更參加了「Asia's Next Top Model」。
選超模獲第5名
本身是「America's Next Top Model」粉絲的她，真是連做夢也沒有想過會有這一天。她說：「我12歲開始就睇呢個節目，集集都有追，好鍾意超模主持Tyra Bank，佢係我偶像。我諗都冇諗過我細個坐喺電視前睇嘅真人騷節目，有日我竟然會置身其中成為參賽者之一，感覺好似發夢咁，好神奇。當時我有位朋友為呢個節目擔任嘉賓評判，佢就提議我去試吓，嗰次選拔約有50,000個女仔去面試，自己可以順利入圍同得到第5名，實在覺得好幸運同好興奮。呢次係一個非常之難得同有趣嘅經驗，比賽過程中識到好多唔同嘅人，接觸好多新事物，擴闊咗我嘅世界同視野。」
Helena最開心是可以同偶像超模Tyra Bank見面，她說：「我會以佢為目標，佢教我哋要『be yourself』，呢點好重要。經過呢次比賽，我對自己更有自信。細個時我好怕醜，好冇自信，但依家我已經學識欣賞自己，好多事只要我哋肯努力同付出就會做得到，就算係夢想都會有實現嘅一日。我應母校邀請，稍後會返去同啲師弟妹分享我嘅經歷，希望我可以成為佢哋嘅榜樣，令佢哋變得更有自信。」
姓名：陳瑞瑩Helena
出生日期：89年7月6日
國籍：瑞典
血統：中國、瑞典
身高：1米76
體重：120磅
三圍：34"、25"、36"
演出經驗：去年底代表香港參加「Asia's Next Top Model」（Cycle 1）真人騷比賽，奪得第5名。