陳樹鵬 X 余迪偉 美食On show　

阿鵬和迪偉，於節目中試過不少食肆，今次訪問特意選了位於Marco Polo Hongkong Hotel 6樓的CUCINA。阿鵬表示附近餐廳都去勻，偏偏未曾到過CUCINA；而迪偉平日則愛到此把酒談心，但用膳只試過一次。兩位都對食肆的無敵維港海景大讚不已，而食物質素呢？則要逐一試過先知。

飲食主持 最緊要夠真

迪：要做飲食主持，詞彙一定要夠多！好多飲食主持都被稱為食神，帶住幾位靚女齊齊食，為觀眾介紹源遠流長嘅飲食文化。但我認為對於一個主持，有個性更為重要。當然對食必須要有要求，總唔能夠海魚同養魚嘅味道都唔識得分！

陳樹鵬，又叫「阿鵬」。本身為足球主持，因說話夠搞鬼而為大眾熟悉。身為《美食法庭》主持之一，其生鬼性格令節目生色不少。	余迪偉，人稱「迪奶」，電台DJ，本身鍾意食，曾獲邀參與「五天精華遊」等旅遊節目，講飲講食講玩。現為《美食法庭》主持人之一，食家形象深入民心。	八爪魚薯仔沙律 $248 迪偉對此款菜式甚為欣賞，指薯仔的軟腍度適中，而墨魚又不會韌如橡皮，當中用八爪魚湯打成的泡沫，使賣相更討好。

鵬：冇錯！時下觀眾鍾意主持有嗰句講嗰句。好似《美食法庭》，我哋4位主持都來自不同領域，例如我係足球主持、迪偉係DJ、Coco係Model、阿Lo則拍劇，每個人都做番自己，令節目擦出更大火花。

紅海蝦意大利粉 $388 意大利紅海蝦用橄欖油燒約6~8分鐘，有龍蝦的鮮味，夠嫩滑，意粉的質感恰到好處。但迪偉表示有點過鹹，淡一點鮮味會更突出。	多寶魚、茴香汁、魚子醬 $338 多寶魚起肉後加入檸檬汁、海鹽等焗約10分鐘，連平日不太喜歡吃魚的阿鵬，也大讚好味。加上鹹鮮的魚子醬，味道更佳。	燴牛面頰肉、雪梨、可可、橙皮 $348 阿鵬最愛牛面頰肉夠嫩滑。全因烹調時工夫多多，先要以160度焗3~4小時，再以洋葱、甘筍、西芹等攪成醬汁淋面，加上梨蓉、切絲橙皮，最後灑上可可粉。

迪：喺節目中，我哋需要即場煮嘢食。即使遇上唔識煮嘅菜式，都唔會預先學定，唔識咪唔識囉，即場跟住師傅學，出嚟效果更真實。

鵬：記得有一次我哋要煮炸物，冇跟師傅指示，爆晒油，嗰啲蝦碌場面相當搞笑，真性情盡現，觀眾會更加鍾意睇！

迪：真性情最重要！當然，粗言穢語就唔能夠出街喇，哈哈……

食到嘔的辛酸事

迪：做節目時，遇上美食當然食得過癮，如Coco曾經喺節目中介紹嘅滷水鵝肝，我就食到停唔到口。但遇到難食嘅，都一樣要擺入口，無計。

鵬：你一講起，我就想到嗰條韓國魔鬼魚刺身，雖然話係當地貴族先食到，但真係臭過公廁。但喺鏡頭前，只可以硬着肚皮放入口，雖然連埋大量泡菜一齊食，但仍然吞唔落，一熄機即刻吐出嚟。

迪：我嗰隻和味龍都不遑多讓。本身我乜都可以放落口，見嘉賓都夠膽食我煮嘅鹽焗和味龍，我當然要試一試。和味龍狀似蟑螂，食時需要擰斷頭部，再啜裏面啲精華！我唔怕核突，但嗰股腥羶味，令我即場嘔出嚟！

鵬：辛酸史又豈止如此？我曾經介紹一款田雞煲仔飯，拍攝時有8~9隻肥美田雞腳，味道唔錯，就推介畀觀眾。點知，過咗冇幾耐朋友就打嚟鬧我「掛羊頭賣狗肉」，皆因佢哋去食就只有兩隻，貨不對辦。

迪：所以話，食肆喺畀傳媒拍攝時要做得真實啲，做得太誇，即使觀眾睇完我哋介紹去食，但係間舖畀唔番拍攝時嘅水準出嚟，到頭來只會做壞口碑。

我好Enjoy呢份工

鵬：當然，做飲食主持都有開心事。我個人好揀飲擇食，唔食河鮮同高膽固醇食物，亦唔太愛西餐。但做咗飲食主持後，先知道原來河鮮唔只可以蒸，仲有多種烹調方法，所以對呢種食物接受度高咗。

迪：哈哈，阿鵬好多嘢都唔食，而我就係一個大垃圾桶。做節目主持，亦啱晒我鍾意周圍搵嘢食嘅習慣。但係食得多，自然會變得有要求，唔想倒啲垃圾落肚。

鵬：出去食飯，待遇都變得更好。不時會遇上被餐廳負責人詢問意見。有時直指啲菜式太鹹，佢哋都會立即為我換一碟，好好招呼呢！

迪：有次我指出某餐廳嘅柚子沙律太粗製濫造，第二日餐廳PR就打畀我跟進情況。當然，我都只係為間餐廳好，唔忍心睇見佢哋愈做愈差！

鵬：做飲食主持，其實都開心嘅，哈哈……

迪：如果唔係，都唔會咁就做咗兩年啦！

撰文：黃夏霖

攝影：胡淑儀

查詢電話：2113 0808