樂基兒氹掂老公拍住上

樂基兒(Gaile)與謝婷婷愛情滋潤萬事足,開口埋口都離不開愛郎,大晒恩愛。Gaile與黎明(Leon)夫妻檔拍MV,甜蜜指老公最明白她心思。而婷婷萬事都問過男友,自言是連體嬰,最想情侶檔搵真錢。

Gaile前晚與謝婷婷為太古廣場2010春夏時裝騷擔任模特兒,演繹最新服飾,Gaile示範了兩套DAKS新裝,婷婷則示範兩套Chloé新裝。Gaile表示不會效法Lisa S.婚後不行騷。而早前為老公Leon旗下新人歌手JW主唱並由Janice Man演出的MV擔任創作總監一事,Gaile說:「同Leon及佢公司合作學到好多嘢,個Concept同Idea係我諗,(Leon有冇讚你?)我冇問佢,總之出嚟效果大家都好滿意,Leon畀咗好多空間我,我覺得只有Leon一個可以拍到呢個MV,佢要求好高,開頭Leon唔想拍呢個MV,我晚晚都氹佢,最後先肯應承拍。」

剩番10分畀Leon

問她夫妻檔上陣怕不怕有拗撬?Gaile說:「係剪片時有少少拗撬,冇話邊個就邊個,每個人都拎個心出嚟傾。(你今次畀自己幾多分?)我畀自己30分、JW20分、JM20分、化妝Set頭20分,剩番嗰啲就係Leon o架喇。(咁咪得10分?)係呀,Leon有10分。(會唔會再繼續合作?)我係一個藝術家,如果有靈感而時間又啱都有機會。今次好開心,佢全程都好support我。」

接job錫住Andy

另邊廂,婷婷男友安志杰(Andy)早前曾表示接job主要考慮不能離開女友身邊太久,婷婷說:「Andy每次都會問我意見,傾吓值唔值得做,例如要去啲偏僻地方,有次搞到佢皮膚敏感,起晒風疹,對腳爛晒,我好心痛。」至於男友話不可以離開她太耐,婷婷謂男友之前去涿州三日,感覺似去了兩個星期般。記者笑她可當男友的經理人,她笑說:「佢喺我心目中好高,我怕到時偏僻啲又唔接,啲衫唔靚又唔接,覺得佢會辛苦又唔接,我驚最後佢會冇job做。」婷婷笑言希望有人找他們情侶檔上陣,以免他們分開拍戲受相思之苦。

採訪:名人組