絲絲講場：亞太區邊隻股票最出息？

建行最豪 中移第五

市場研究機構IHS Markit發表報告，按統計今年亞太區派息總額最高嘅五大股中，有兩隻係港股，分別係榜首嘅建行同排第五嘅中國移動(00941)。

香港上市公司總派息額為亞太區第三，僅次內地同日本，排名同舊年一樣。IHS Markit更預期，港股明年派息總額會按年增加9.4%，去到9,119億元，佔全亞太區派息總額兩成。

講到明年港股派息，佢哋睇好房地產會取代銀行業成為派息最多嘅板塊，但派息增長怕且Keep唔到今年同舊年嘅30%升幅。

佢哋又預計，保險業明年將成為派息額升幅最大嘅板塊，按年升36.5%。至於銀行業就升4.2%。不過，佢哋睇淡汽車及化工行業，預期呢兩個板塊嘅港股派息額將減少7.4%及20.9%。有咁正嘅貼士，絲絲祝大家明年收息收到盆滿缽滿！

余絲韻