既然不少人對騰訊後市走勢睇法較淡，亦有不少蟹民高追貴貨，看看專家有何對策。
散戶Amy：「邊個夠我『燈』！三月時諗住等埋騰訊公布去年業績買好穩陣，結果業績真係靚仔，我就喺近460蚊買咗，點知大股東Naspers突然沽貨，之後我就愈蟹愈深，依家每股蝕咗過百元，慘慘豬呀。」
點評：志昇麥嘉嘉指，騰訊由460元跌至350元水平，累跌逾兩成，對於短線投資者早應嚴守止蝕。中長線騰訊股價仍看好，但今年能否重返家鄉難以預料。一般而言，重貨的仍應減磅至可安心長揸的水平。
散戶Winnie：「我幾年前開始月供股票，諗住可養成每月儲錢習慣，騰訊近年升得咁勁當然有買，但我供到唔知平均價幾多，賺定蝕都唔知。大家睇得咁淡，我應唔應該繼續供？」
點評：騰訊近六年股價皆錄升幅，包括去年升1.14倍、一六年升24%、一五年升35%、一四年升13%、一三年升98%、一二年升59%。若投資者在早年已開始投資騰訊，現價計較大機會仍是賺多過蝕。
麥嘉嘉建議，月供股票採取平均成本法，只要股份長線仍向上，對投資者影響不大，暫不用貿然斷供。不過，反手提高供款額亦未必需要，始終暫時市況未明。
散戶Andrew：「我冇買騰訊本來好開心，點知早幾日有朋友提醒我，原來我嘅強積金重注港股基金，騰訊急挫都關我事。咁點算好？」
點評：騰訊作為恒指重磅股，又是市值最大、交投最活躍的港股，不少港股強積金基金和追蹤恒指的指數基金都有8至10%不等的騰訊持倉。騰訊股價下跌，相關基金表現亦會受累。麥嘉嘉對港股短線走勢看法較淡，但強積金對大部分打工仔來說是中長期投資，毋須太擔心短期市況波動。當然，從環球資產配置上看，短期美元資產會較受追捧，美股強積金基金、美元貨幣市場強積金基金跑贏機會較大。