Market Insight：息口趨升瞄準受惠股
雖然美國帶頭空襲敍利亞，全球股市震盪，惟見港股跌得比外圍市場甘。昨日恒指低開低走，埋單恒指唔見492點，收報30,315點，主板成交1,076億元。跌市除外圍利淡因素影響外，資金持續流出香港，金管局係咁接貨，壓抑投資者入市意欲。息口敏感的地產股沽壓增，新鴻基地產（00016）及信和置業（00083）同跌逾2%，似預示地產市道調整之日愈來愈近。
事實上，美國利率正常化已啟動兩年，香港銀行一直未有跟隨上調最優惠利率，及至三月美國再度加息，港息與美息差距進一步拉闊，引來套息交易，港匯承壓。至上周，金融管理局終於要出手入市買港元，港元拆息連續兩日全線抽高。睇形勢，走資仍會持續一段時間，並限制港股短期表現。
次季股市風高浪急
走勢上，恒指仍處於29,500至31,600點水平波幅區內，暫仍以上落市視之，惟從藍籌表現明顯可見，市況動力已進一步減弱，一旦跌穿上落區底部，提防會引發更多止蝕盤出現。若有心水股想加注，亦未宜心急，始終預咗第二季股海都係波濤洶湧，靜候Big Sale再出手。
至於對銀行股而言，息口趨升未必一定係壞事，尤其是當稍後時間香港銀行調高最優惠利率，將有助改善銀行息差，故見昨日藍籌股之中，能逆市上升兼升幅最大的一員，正是中銀香港（02388）。本月初股價再試36元水平承接後展反彈，反彈主要阻力仍在39至40元水平，表現有望強於大市。
騰訊控股（00700）股價又再失守405元配股價，昨日更一度跌穿400元，低見399.2元，收報403元，跌1.2%，已幾可肯定走勢進一步轉弱，短線一旦失守關鍵位398元，尋底之旅繼續。短線唔做淡友的話，宜暫時離場，勿逆勢而行。
國務院宣布一系列支持海南全面深化改革開放的指導意見，變相讓海南搞國家體育旅遊兼且博彩性質的示範區。雖然現階段講的只係體彩及賽馬，但之後逐步推多元化多樣化的娛樂休閒活動的期望十分合理。
炒海南概念恐短癮
雖則話呢啲都係相對長遠的事，但無論係香港抑或濠江都應該感受到競爭，並須及時檢討旅遊及娛樂休閒服務及設施的競爭力。畢竟隨着內地經濟持續發展，消費者需求日增，餅愈做愈大，就係睇各地方政府有冇本事規劃好，執行好，飯來張口的日子已成過去。
昨日見到升幅最大的港股係一隻彩票股。不過，古勝印象中，現成做彩票相關業務的個股，冇咩邊隻業績係有睇頭，蝕住錢的細價股，藉政策消息炒概念，多數都只係短癮，都無謂走入去接火棒。
古勝