絲絲講場：銀行掟1億谷Fintech

近年香港銀行界管理層人人口邊掛住「金融科技」（Fintech），不過唔係得個講字，渣打香港就掟咗一億元設立新創科中心，佔地逾一萬平方呎，為渣打員工同埋創科Start-up拍檔提供共享空間。

渣打仲會同香港大學合作，為一千名員工提供金融科技嘅網上認證課程。渣打香港行政總裁禤惠儀仲話打算請100名創科人員進駐中心。咁未來會掟多幾多個一億落呢個創科中心？禤惠儀就話要視乎日後發展情況如何嘞！

中銀香港（02388）都搞咗「極客大賽」，出40萬獎金吸引參賽隊伍交出金融科技相關方案。中銀香港資訊科技部總經理鄭松岩話收到好多創意豐富嘅分行服務、支付同投資金融科技方案，仲話會好好研究方案，睇吓可唔可應用。

其實出幾十萬獎金就吸到好橋，先係終極絕世好橋！

余絲韻