絲絲講場：恒生一姐練功Show球技

由零開始 練足5個月

講嘅係Louisa嘅球技，不過唔係佢最擅長嘅Tennis（網球），而係Table Tennis（乒乓球）！佢話自己由零開始，練咗五個月！點解要咁勤力？事關恒生乒乓球學院尋日舉行畢業典禮，佢當然要落場露兩手啦。

佢先同香港乒乓總會教練陳淑媛熱身示範，進入狀態後教練即刻增加難度，喺球枱上放咗三個迷你乒乓球拍，Louisa好快就打個乒乓波擊中晒，唔講仲以為佢平時有玩開保齡球。

熱身完，Louisa就同男子乒乓球世界排名第七位嘅黃鎮廷切磋，Louisa一啲都唔輸蝕畀專業球員。

Louisa呢五個月來，每個月平均都練四至五次，每次大約一個鐘，連教練陳淑媛尋日都讚佢好勤力。Louisa話，乒乓球比網球更考反應同靈活度，佢仲鼓勵學生球員話「我咁都接到波，學生球員更加唔使驚啦！」

余絲韻