絲絲講場：反斗城旗艦店 18國際品牌撐

玩具反斗城（Toys'R'Us）一連11日喺尖沙咀旗艦店舉辦「Toy Fair 2018」，邀請咗18個國際玩具品牌進駐，並設置玩具體驗區，雖然話係香港最大旗艦店，但感覺似乎太過擠迫喎！

好在小朋友見有咁多玩具，有得玩，迫都唔理得咁多啦！現場家長都冇咩所謂，皆因同小朋友行玩具店，當然最注重體驗啦！所以玩具反斗城大中華及東南亞地區首席商務官何楚嫣（Jo Hall）都話，唔怕網上銷售同電商平台會影響實體店銷情，因為佢好清楚亞洲家庭買嘢，鍾意拎上手摸吓玩吓。

她仲話，第一次搞呢類型活動，相信之後會繼續舉辦，又話日後有可能返內地，或者去新加坡、泰國、台灣等地。現時喺香港有15間分店，內地就有超過160間，亞太區有約500間舖。Jo仲話，公司過去五年每年都開40間舖，相信繼續維持差唔多嘅擴張步伐。

余絲韻