絲絲講場：新上市送禮愈重愈旺
昨日有三隻新股首掛，為今年新股市場打響頭炮！三間公司送嘅禮物都夠晒諗頭，絲絲都希望今年新股市場繼續大旺！
阜博升20% 福紡潛水
其中，阜博集團（03738）送嘅烏江石就夠晒重秤，上面刻住「握東西以求是、得形勢而創新」仲係前任浙江大學校長潘雲鶴題字添！點解大學校長同阜博有關？因為主席兼行政總裁王文斌係浙大校友囉！阜博首日股價標青，收報3.1元，較招股價升20%，帶挈投資者每手帳賺520元。
莊皇集團（08501）送嘅係一條「龍頭魚身」嘅水晶擺設，寓意新一年股市騰飛，如魚得水，昨收報1.71元，較招股價升9.6%，每手帳賺300元。
而福紡控股（08506）就整咗部迷仔針織圓緯機模型，手工相當精細，可惜股價就潛水，收報0.188元，較招股價跌14.54%，每手帳蝕384元。
嚟緊今個月仲有二十隻新股排住隊上市，相信港交所收紀念品都收到手軟。
余絲韻