絲絲講場：恒大千五萬年薪撬分析師

內房地產龍頭之一嘅中國恒大（03333），最近高薪挖角前方正證券首席經濟學家任澤平，擔任副總裁級嘅首席經濟學家兼恒大經濟研究院院長。聽講年薪有成1,500萬元人民幣，即是月袋超過125萬元！

任澤平估中A股5000點

究竟任澤平有咩咁把炮？佢二○一四年加入國泰君安之後，曾經發表過A股「5,000點不是夢」主張，到咗二○一五年上半年個市真係如佢所料，即時一炮而紅！

隨後佢又發表「海拔已高，風大慢走」，結果A股無幾耐就迎來大股災，令到唔少網民齊齊封佢做網紅分析師。

之後佢過檔去方正證券，又發表「經濟新周期」、「L形經濟」等觀點，風頭唔小。魚唔過塘唔會肥，任生今次真係「千萬年薪不是夢」！

分析經濟 研戰略決策

恒大內部人士透露，任澤平將主要負責帶領新成立嘅恒大經濟研究院，做吓宏觀經濟分析同了解市場發展方向，提供戰略決策相關支援。

其實恒大出手闊綽都不無道理，皆因公司剛剛公布咗上個月嘅銷售數字，十一月合約銷售額足足有成480.6億元人民幣，而今年頭十一個月累積銷售額更加達到4,704億元人民幣，超過佢哋調整後嘅全年目標，即係4,500億元人民幣一截。嘩，恒大生財有道，唔怪之得使錢都疏爽過人！

余絲韻