過去幾個星期，都同大家推個股、揀板塊，今日輪都輪到我講吓其他嘢。趁住特朗普於周五凌晨宣布下任聯儲局主席的人選，我就同大家拆解吓，點樣應對不同的人選同大市要點部署。
目前大熱的有三個人選：現任主席耶倫、理事鮑威爾同著名的經濟學家泰勒。唔講唔知，歷任總統都唔會公開誰個位列於候選名單的。換言之，以往從來都唔會有「跑馬仔」這回事，到總統揸定主意喇，大眾先知道花落誰家。不過，特朗普唔知規矩有唔知規矩的好，起碼我們都有個心理準備嘛！
介紹番幾隻馬仔的background先！鮑威爾是非常鴿的理事，從一二年至今，他在聯儲局議息會議上未嘗投過一次反對票，百分百支持由耶倫的貨幣政策，提倡低利率，堅持收水要循序漸進。
泰勒就唔同咯，佢鷹到出汁，於早年提出的「泰勒規則」入面，佢提出了聯儲局應該於一二年已加息，今年息率應係3厘，而唔係目前的1.25厘！
他們彼此的旗幟相當鮮明，俗語話兩雄相爭，就必有一傷。佢哋傷唔緊要呀，我怕個市傷咋！明眼人一睇，就知泰勒跑出就實股災啦！
為咗唔好自己嚇自己，我翻查了政治博彩網站PredictIt的賠率，截至周四傍晚為止，鮑威爾有90%的勝算，耶倫就得4%，泰勒仲慘，得1%！你心諗：「車！你早點講啦！難為我花咁多時間睇你寫嗰幾百字！」嗱，說話並唔係咁講！常言道：陰溝裏翻船。想當日我夠以為希拉妮做總統啦！萬事小心點好！
不過，又咁講，假如結果真是鮑威爾的話，好友又過一關，就應該發力喇！除了我於周三推過的內險股之外，油股都係我的favourite！上呀，恒指！
富昌金融研究部總監 譚朗蔚（作者為註冊持牌人士）