孖妹S檔案:專家教波動市點避險?

傳統上,環球金融市場動盪,資金會湧進黃金、日圓及美債等避險資產,但最近中美貿易戰輕微降溫,上述避險資產又似乎冇咩顯著升勢。反而上周末美、英、法聯合向敍利亞空襲,市場又開始驚驚哋。因此,孖妹懷疑股市染上奇難雜症,需要快啲搵「專科醫生」睇睇!

諸:華夏基金(香港)ETF業務主管 諸人進

李:紀慧環球資本董事及策略師 李卓峰

陳:ADS Securities零售市場銷售總監 陳健豪

林:中金公司香港資產管理部負責人兼董事總經理 林寧

金:金瑞基金首席執行官 Jonathan Krane

Kitty:聽過「英國天,鬼婆臉」未?呢句形容當地天氣變幻莫測!咁「美國天,Donald臉」嘅天氣,會唔會更高深莫測?

彩兒:擺明啦!美國總統特朗普上周四突然釋出善意,話依家並非中美貿易戰,而係中美貿易談判。仲探討緊美國重新加入跨太平洋戰略經濟夥伴關係協定(TPP)嘅可能。不過,美國退出TPP只係一年幾。

Kitty:咁難捉心理,要避吓險先得。

彩兒:特朗普隨時改口,狙擊中國,致全球政經再洗牌,股市難免有壓力。

陳:依家未由Risk-off轉Risk-on,大家要避險至上。目前,環球經濟面臨四個未知數,包括中美貿易戰、美日、歐美貿易協議,以及北美自由貿易協議等。若要完全Risk-on,就僅有6.25%可能性,所以我預計港股喺五月中前會繼續係上落市,買日圓及黃金最佳。

再者,美國聯儲局主席鮑威爾上場,市場估計今年內會加息至少三次,但佢哋未諗到若中美貿易戰惡化,將會騎劫股市,令加息步伐比預期慢,屆時美元弱、日圓強。

日圓看俏 108入定貨

Kitty:我明呀!遇上危機,梗係揸銀紙、黃金着草!

彩兒:日圓會有幾強?三月廿三日美國打響貿易戰戰鼓,當日見日圓即飆升,美元兌日圓低見104.64;但近日美元兌日圓彈番上逾107水平。

陳:我睇日圓中線會升值,美元兌日圓會跌返到104水平,投資者可趁107至108水平追入。

追買黃金 可直接避險

Kitty:股市波動,就要買黃金?

李:股市同金價一般有正向相關性,因股市暢旺,財富效應,黃金需求大,故股市同金價正常會齊升。年內股市波動大,但金價波動唔大,我估今年金價幾穩定。預測金價走勢,要留意美元、外匯走勢及政治問題,金價同美元嘅負相關性高;當外匯欠方向,投資者應會追捧黃金。

年內睇1500 留意ETF

Kitty:三月廿三日中美貿易戰擊鼓鳴冤,金價曾飆升1.61%至1,350美元。

李:我睇好黃金,年內上望1,500美元。投資者可買入黃金ETF(交易所買賣基金)如SPDR金ETF(02840)。

彩兒:黃金概念股包括滬股通名單嘅西部黃金(601069.SH)、赤峰黃金(600988.SH)曾升。

陳:金礦股同金價關連度低,我建議直接買黃金避險。我認為,金價未反映通脹升溫,估金價中線會升至1,365美元樓上,建議投資者喺逾1,344美元水平追入,止蝕位1,300美元。

財策左右 美債息升硬

彩兒:美債又點睇?早排曾有大量資金湧入美債,美國10年期國債孳息率更跌至逾2.71厘水平。

陳:聯儲局縮表同加息,美債息遲早向上,所以唔覺美債太吸引。

李:我同意。唔少國家如南非、日本、美國及以色列等,積極討論加密貨幣徵稅方案,所以預計有逾千億元流出加密貨幣市場,並很大機會流入傳統避險資產,包括黃金或美債,但美債始終受聯儲局加息影響,美債息短期會向上。

A股ETF跟大市向好

諸:今時唔同往日,環球股市動盪,有好多未知數。好彩,A股同環球市況相關性低,所以投資風險唔係好大。中國係全球數一數二GDP增長最快嘅國家,而且中國都算新秀,所以投資中國應比投資歐美能獲取更高嘅超額收益。

我啱啱去咗中東一轉,當地唔少投資者對美股持續多年狂升表示憂慮,又驚特朗普唔知幾時出新招。前瞻全球唔同國家前景,覺得中國一枝獨秀,所以開始加倉買中國資產。我都認同,亦睇好人民幣,因人民幣已正式納入國際貨幣基金會(IMF)特別提款權(SDR)貨幣籃子,未來人民幣亦將成為全球其中一個主要儲備貨幣。

彩兒:買港股,我都話識啲,A股真係一頭霧水。

諸:若揀中國股票,就要求高投資技術,而買一籃子股票ETF,就免卻呢個煩惱。較為人熟悉嘅有,涵蓋中國股票嘅ETF包括安碩A50(02823)及華夏滬深三百(03188)。

Kitty:買ETF怕唔怕流通量唔夠高,走佬唔夠快?

諸:唔會,A股ETF包含一籃子中國股票,可分散風險,所以愈嚟愈普及。去年底,十二月最後一周交易日,因機構提前配置中國股票,華夏滬深三百獲7億元流入。今年一月份市場氣氛熾熱,華夏滬深三百持續流入2億元。二至三月份,隨着農曆新年資金流動性趨緊及兩會對市場產生不確定性,華夏滬深三百共流走12億元。

此外,MSCI明晟公布,今年六月起分段把A股納入MSCI新興市場指數。參考台北及韓國股市納入MSCI新興市場指數後,股市喺往後半年表現明顯上揚,料A股仍有得升。

看好消費醫藥類股份

彩兒:點比較邊隻A股ETF好啲?

諸:今年我對金融類股份有保留,如內銀股會謹慎啲。十九大會議提及金融去槓桿,除影響炒孖展散戶外,仲要求壓縮銀行資產負債表,並打擊影子銀行活動,令資本充足比率提高,都會逼使銀行籌錢、賣資產,所以會影響內銀未來業績表現,股價受壓。我較睇好傳統股份,包括消費、醫藥及醫療保健股,因中國消費升級,民眾會食多啲保健食品。

彩兒:安碩A50嘅內銀及內險股佔比近半,華夏滬深三百嘅則佔逾四分之一。不過,比較兩者市盈率,華夏滬深三百較安碩A50為高,前者逾15.3倍,後者逾12倍。

科網股ETF諗得過

Kitty:去年單買一隻騰訊控股(00700)、吉利汽車(00175)就有唔錯回報。今年冇呢隻歌仔唱!

諸:無錯,雖然中國經濟向好,國民消費力強,科網企業從中受惠,中國政府有意推進高科技產業,將騰訊及阿里巴巴(美股:BABA)等捧起,但科網股值唔值得投資,仲要睇佢哋非主營業務增長潛力,聽聞唔少機構投資者揸住嘅科網股仍維持低倉位。

彩兒:中金金瑞中網(03186)啱啱喺上星期二掛牌上市,佢追蹤中證海外中國互聯網指數,投資騰訊、阿里、京東(美股:JD)及微博(美股:WB)等。

林:互聯網概念將會係全球投資潮流,我相信呢隻ETF會受歡迎。

Krane:無錯!趁移動電子商務喺中國咁Hit,同埋中國預託證券(CDR)未開通,內地投資者未有渠道買入美國上市嘅中國科技公司,出呢隻ETF就最啱,估計會有好多內地機構投資者追捧。我哋都歡迎CDR開通,料有利科網股股價。

彩兒:我驚科網股波幅大。

Krane:短線走勢唔使理,呢隻ETF值得「Buy and Hold」(長線持有)。佢唔單止大包圍買入龍頭科網股,因佢純追蹤指數,冇人手選股,故亦可適時捕捉有潛質嘅互聯網新股。

若有料報畀彩兒同Kitty或有嘢問,可電郵money.biz@on.cc

Kitty、彩兒