Market Insight：醫藥股業務大有可為

季內等機會落鑊

重磅股要抖抖氣，又輪到二線股謀接力。其實近年升浪中，內地醫藥股走勢真係好個別，板塊表現追唔上，原因眾多，如行業缺乏重大利好消息，企業業績比較參差等。不過，中國人口咁多，加上人口老化，醫藥市場大有可為，實力醫藥股真係唔怕長坐。

再者，最近國務院印發了《關於深化審評審批制度改革鼓勵藥品醫療器械創新的意見》，有政策消息可炒，當批重磅股已大致升定，喺末季指數繼續高企的話，醫藥板塊格局真係等落鑊。

醫藥股走勢個別，經已升定先的有優質股，如復星醫藥（02196）今年初由23元水平起步，六月見32元水平後回吐，由九月中旬30元邊又再起步，至昨日高見36.25元，唔聲唔聲經已升番上一五年大時代高位。

至於石藥集團（01093）的表現就更加誇張，股價由今年初的8元水平，反覆升抵上周高位見13.68元，簡直好似放紙鳶一樣。

康哲小注買坐定定

睇番復星醫藥同石藥的特色，係兩者都有盈利基礎支持，而且都具備研發創新藥物的能力。論產業鏈，復藥的覆蓋全面；論增長潛力，石藥具爆發力，尤其是公司正研究分拆業務上市，股價強於板塊必有其因。

相對落後的，可以睇睇隻康哲藥業（00867）。其股價今年初由12元水平起步，現價14.4元，累升幅度唔算多。

留意到九月初，公司主席及執董分別減持公司股份，每股作價13.6元，惟從其後的股價表現可以推斷，批股都係落入強者手，呢個價有人接得貨，應該有得諗，小注坐定定，年底前目標反覆試叩18元，回吐宜守13元。

至於兩隻AH股，山東新華製藥（00719）及麗珠醫藥（01513），走勢都唔差，但又要顧埋A股表現，古勝都係屬意喺啲直接又簡單的目標入手。

跟住紅色力量搵食

古勝同班卜架飯敍，聽講佢哋依家已唔再點睇外資投行研究報告，因為外資行推介的股票頂多一日貨仔，冇咩好炒。反而，班卜架依家每朝返到公司，第一時間係上網睇內地或中資券商研究報告、人氣財經微博或內地股票討論群組，睇吓呢期講緊咩股份，只要追蹤班內地資金呢期炒咩股票，先至搵得到食咁話！

大價股照炒到出煙

所以話，依家炒家都要跟住紅色力量搵食，股民改唔到習慣，繼續喺個股海搵本地股仔坐貨等炒，十居其九食白果。

講到坐股仔，大概班大戶都知道呢幾年股仔傷得太多人，加上監管部門盯得緊，所以要改一改，走吓「大價股」路線會比較好做。以半新股眾安在綫（06060）為例，班大戶要食大茶飯，亦唔志在益吓班老散，等掛牌T+2高一成左右收番啲貨，貨源歸邊跟住就開波挾上去，雖然昨日未能進身紅底股，都相信都係遲早的事。

就咁樣，個幾禮拜隻股炒高咗六成幾，大家覺得佢係大價股，又有股東名牌效應，擺明係貨乾炒到出煙。所以話人靠衣裝，佛靠金裝，股要靠「價」裝！

古勝