絲絲講場：京東劉強東成功有段古！
今年43歲嘅京東集團創辦人劉強東，今時今日身家以百億計，查實佢18歲前屋企窮到一年只食到一兩次肉！
細時捱窮啃粟米
劉強東最近接受外媒訪問，講開自己喺江蘇農村出身，七○年代生活最艱難時，每年六至九月日日三餐都係食粟米，早餐粟米粥、午餐粟米煎餅、晚餐粟米窩頭，而粟米窩頭尤其惡啃到佢喉嚨出血！其餘八個月無粟米，就三餐芋頭囉。
直到一九九二年佢18歲，考上北京中國人民大學，屋企無錢供佢讀書，鄉親父老湊夠500蚊畀佢，無錢嘅就出雞蛋，結果佢到咗北京首周日日食蛋。
到第二周佢搵到抄寫Part time做，半工讀之餘，仲自學寫Program。當年適逢好渴電腦人才，佢開始賺到啲錢，夠錢畀鄉下屋企人起樓，仲有錢做小生意。
直言「無賣過假貨」
佢最初開餐館但失敗，之後開連鎖店賣嘢，但遇上○三年沙士，逼住變招做網上生意，一路做到今日……不過最震撼絲絲嘅一句，係佢話「從第一天開始，我就沒有賣過一件假貨」！
余絲韻