從事資產管理、風險管理、物業管理，甚至圖書館管理，大家就聽得多，唔知有冇聽過「市值管理」呢份工呢？絲絲聽聞早排就有上市公司老闆特登請人做「市值管理」，咁特別嘅，即係做咩呢？
線人話，公司老闆講到明其實冇乜嘢做，總之要求個市跌時，公司股價唔好跌咁多，當然個市升時，就梗係要升得勁過人。咁大家明白做乜未？
公司老闆當然唔係「公然」登晒報請人啦，係於飯局中搵人，不過，聽聞公司老闆講請人做「市值管理」時，一點都不忌諱，反而聽的人有點愕然。
有證券行口痕友就話，做莊就做莊啦，居然仲叫「市值管理」，真係要寫個服字！
佢仲話，其實「呢份工」都幾普遍，單在其證券行，就隨便見唔少「客仔」日日坐鎮，日積月累咁專炒一隻股票，估計都係幫公司老闆做「市值管理」啦。
佢仲形容，呢班「管理員」同「金牌莊家」差好遠，經驗不太夠且不太專業，估計係公司老闆可能為了縮皮，又信唔過出面啲莊家，便搵幾個自己伙記，在一、兩間證券行開戶，左手交右手、搓吓波仔，維持吓交投咁。
投行人士話，大家不用大驚小怪，有啲上市公司會委任策略及投資顧問，幫公司發展策略同實施有效投資計劃，「提升」吓公司價值咁話喎！
余絲韻