絲絲講場：內地人炒美國樓似網購

睇樓講價 WeChat搞掂

根據美國全國房地產經紀協會二○一五年報告，美國房產海外買家中，內地人最多，出手闊綽，平均使83.1萬美元（約648萬港元﹚買樓。只要啲樓啱心水，內地客畀多啲唔係問題，所以好多美國地產代理都醒水開番個微信專拉內地客。

就算講緊係500萬美元嘅紐約物業，即係成3,900萬港元，內地買家都全程用微信溝通，唔單止「睇樓」喺微信睇片同睇相，連價都喺微信講埋，傾掂就由美國送份電子合約過去，內地買家就現金過數埋單。買樓講座？示範單位？乜都唔使，好似網購咁，機票同15粒鐘機程慳番。

唔係話開咗微信戶口就拉到客，啲美國地產經紀仲要落足心機，將微信當私人Blog，時不時打卡、講吓飲飲食食着衫扮靚，咁先冧到內地客。呢招，唔知香港使唔使得呢可？

余絲韻