絲絲講場：鱷王達利奧教仔有一套
全球最大對沖基金橋水（Bridgewater）創辦人、有新一代「鱷王」之稱嘅達利奧（Ray Dalio），今年已70歲，叱咤國際金融市場，佢管理嘅基金近年回報仲跑贏「國際大鱷」索羅斯。不過，「鱷王」原來教仔都有心得。
話說佢育有4名「鱷仔」，分別係Matt、Devon、Paul，同埋Mark Dalio。究竟佢嘅育兒之道如何？外媒訪問咗佢現年35歲嘅大仔Matt Dalio，佢就話：「我爸爸經常講，Matt，喺你嘅生命中，可以擁有任何想要嘅嘢，但不能擁有一切。我諗佢嘅意思係，當你想喺生命中擁有真正想要嘅嘢，就要放棄其他所有嘢，但好多人都不願意放棄。」
專注做自己喜歡嘅事
事實上Matt都幾叻仔，無依靠父親，選擇建立自己嘅公司。佢話：「喺我嘅生命大部分時間，都見證父親只會專注其喜歡嘅事情，唔會分心喺其他事上。我向父親學到嘅就係唔好只為錢工作，要做自己喜歡嘅事。如果你能夠做自己喜歡嘅事，錢就會跟住嚟。」
至於「鱷王」達利奧管理緊1,030億美元對沖基金資產，有乜嘢投資建議畀年輕投資者呢？佢就勸勉年輕人，投資一定要識得「恐懼及謙卑」，「恐懼」係指唔好孤注一擲；「謙卑」係指唔好狂妄自大，冇人乜嘢都識！
余絲韻