絲絲講場：電訊大亨跌咗個洪都拉斯
年尾埋數計一計，今年邊位富豪最陰功豬？墨西哥電訊大亨斯利姆（Carlos Slim）睇怕走唔甩，事關佢幾乎跌咗個洪都拉斯！（洪都拉斯係一個中美洲嘅國家，咁都唔識？仲唔快啲自己上網查）
身家大縮1560億
斯利姆曾經連續4年係全世界最有錢，但今年身家大縮水，縮咗差唔多200億美元（大概1,560億港元），即係等於唔見咗大概成個洪都拉斯經濟規模。斯利姆近呢兩年都只係喺富豪榜做二奶，佢揸住57%股權嘅電訊公司America Movil，今年股價跌咗18%，7年嚟最甘。
想當年America Movil壟斷墨西哥七成手機同六成二固網網絡，仲帶挈斯利姆由一○年到一三年連續4年做全球首富。但自從墨西哥政府要打破壟斷，America Movil焗住將電訊網絡開放畀其他公司後，佢嘅業績係咁跌，斯利姆一四年起連首富個朵都冇埋。
絲絲諗，本地《競爭條例》啱啱出台，出年年尾唔知有冇邊位陰功豬呢可。
余絲韻