絲絲講場：4大敗家習慣點解救？

經常向Friend借錢

好多人都試過向朋友或屋企人江湖救急撲水，不過，若然每個月逢糧尾嗰幾日你都「江湖救急」，戶口冇錢到連嗰幾日都過唔到，咁其實已經係一個極危險嘅信號，顯示你根本理財無方、對金錢唔負責任。人人都有需要救急時，但唔係時時囉。咪充「大頭鬼」，冇錢嘅話就唔該節省開支，一係就搵方法賺多啲。

鍾意先碌卡後找數

唔少千禧代（即是80後、90後、00後）鍾意乜都碌信用卡，貪遲啲先找數，又鍾意還Min Pay（最低還款額），若然仲會用張卡碌Cash（現金透支）嚟用，死得。一班朋友食飯，你碌卡找數先，乘機即袋班朋友夾番嘅錢。呢個其實係壞習慣，同先使未來錢冇分別。除非你有能力卡數月月清，否則剪咗張卡好過。

將現錢擺屋企蝕息

咪以為唔碌卡齋用Cash就冇事，都要睇你啲錢放邊，放喺屋企同樣唔係好事，一來有賊就唔好，二來連少少利息都賺唔到。唔該，至少都存入銀行。

退稅未到手就使清

如果你係納稅人士，有時候政府都會退稅「派糖」，唔該你千祈咪因為有退稅，就即刻將筆錢使清，咁同你碌卡碌咗去其實冇分別，反而應將筆錢儲起，留番下次繳稅時用。

你又中咗幾多樣？上面講緊嗰四個敗家通病，絲絲又問咗幾位財圈人，佢哋個個都話自己一樣都冇中喎。但係老老實實……

金利豐證券黃德几：慘痛中學精

黃德几話十零年前試過入不敷支，「有乜就梗係搵老竇阿媽幫手」，到阿爸阿媽出聲話佢至使少啲，兼做多份Part Time，就係靠「量入為出」自己搞得番掂。佢依家都仲好鍾意碌卡，但就定實每月自動Full Pay找卡數，「信用卡唔應該用？最緊要係用得其所，唔好矯枉過正」，碌完卡Full Pay找數商戶畀手續費，仲賺埋飛行哩數。

京華山一彭偉新：儲銀紙出事

彭偉新使錢一向好穩定，唔會突然使大咗。佢鍾意儲鈔票，亦試過一次過攞八萬蚊嚟買，不過都係能力以內。佢亦唔鍾意先使未來錢，卡數必定個個月清，皆因佢有小朋友。「如果自己Handle唔到，點去做榜樣呢？」

前輪后趙海珠：Facial易中招

珠珠一向係目標為本，諗住要對銀色高跟鞋，佢就只去睇銀色高跟鞋，其他嘢都Sell唔到佢。但對住美容院Sales，佢就「好容易甩唔到身，使大咗」，幾大先？「最犀利嗰次係買咗個Package，六位數字（即係以十萬蚊計！）……

御豐理財香敏華：為食會使大

一個超市、一張自動增值嘅八達通、好多嘢食賣，呢幾樣加埋，就可能係香敏華嘅死穴。「張八達通經常嘟，嘟吓吓嘟多咗。好似去超級市場買嘢咁，嘟到變咗幾百蚊囉At Least。」皆因佢鍾意食好嘢，食啲比較貴嘅，鍾意搵啲好食嘅地方，最捨得喺食嗰方面。

星展王良享：只敢袋現金

王良享係個Keep好少信用卡嘅Banker，「我唔鍾意碌卡，唔鍾意信用卡」，啲信用卡都係人哋或銀行畀佢嘅。一班人食飯時，佢絕唔會為咗想儲分而碌卡找住數先。佢平時出街會帶多啲現金，「我鍾意用Cash多啲，安全啲。有Cash喺身，安落啲嘛。」

佢唔會向朋友借錢，「我買嘢係有Target先買；Big Items嘅，會諗清楚係咪需要先買」，好少會使大咗。