絲絲講場：四叔授你 發達4式

話說四叔前日去咗北京，皆因清華大學有幢以佢個名命名嘅科技大樓落成。四叔參觀清華、北大之餘，仲同學生打成一片，有學生問佢有咩發達嘅方法。

「早婚好難有錢剩」

問嗰個直接，四叔亦答得直接，分享咗四個「致富之道」：一、刻苦勤力；二、經濟未定，唔可以早婚，因為早婚好難有錢剩；三、要有第一桶金，以錢搵錢；四、俗語有云，男人最怕入錯行，女人最怕嫁錯郎。

不過，年輕人血氣方剛，早婚未必自己控制到；今時今日物質享受又多，儲第一桶金都唔係話容易。所以概括嚟講，發達之道一字記之曰：忍！

畀多少少自控，就有好多嘢番嚟。就睇四叔，佢家族掌控多間上市公司：恒地、中華煤氣（00003）、香港小輪（00050）、美麗華酒店（00071）及恒基發展（00097）等，估計舊年四叔收呢啲上市公司股息咁都值超過幾十億。根據今年個《福布斯》富豪榜資料，四叔個人身家成250億美元，即係大概1,950億港元。

今次四叔上京行，幾乎係全家總動員，大仔李家傑、細仔李家誠、大女李佩雯、女婿李寧、外孫女李敬恩都一齊出動；恒地高層亦空群而出，執董黃浩明、林高演、孫國林都有去。

話時話，「致富之道」第四式，講到「男人要揀啱行嚟入」就要Update吓，事關今時今日女人都一樣要；至於「女人要揀啱郎嫁」，就肯定未Out，就睇吓四叔位千億新抱。

余絲韻